30 дневен притвор за началникот на петта управа на МВР Горан Груевски

Судија на претходна постапка изрече мерка притвор во траење од 30 дена на првоосмничениот во акцијата „Тврдина“, Горан Груевски, инаку началник во управата за безбедност и контраразузнавање.

Судот вчера го одби барањето на специјалното јавно обвинитлство за претрес во домот на Груевски, кој се сомничи за уништување на опремата за прислушкување на МВР, но денеска тој околу 13 часот заедно со своите адвокати пристигна на распит во Кривичниот суд. Распитот траеше околу 9 часа, а неговите адвокати го напуштија судот околу 21 часот и 15 минути, накратко соопштувајќи дека распитот е завршен и се очекува судот да донесе одлука како ќе постапи по барањето за притвор на специјалното јавно обвинителство. А околу 22 часот и 30 минути беше забележано зголемено присуство на единиците „Алфи“ кои дваесетина минути подоцна го спроведоа со лисици.

За останатите осомничени не беше побаран притвор. Наместо тоа, второ четврто и петтоосомничените им беа изречени мерки за претпазливост, односно забрана за напуштање на престојувалиште, одземање на патна исправа и обврска за јавување во судот за потврда на присуство. Истите мерки освен последната и беа изречени и на третоосомничената Гордана Јанкуловска, поранешен министер за внатрешни работи, која се сомничи за злоупотреба на службена положба. Затворската казна за ова дело изнесува од 5 до 20 години.

Извор: 24 Вести