Анархисти го зазедоа седиштето на Сириза

Група анархисти го окупираше денеска седиштето на владејачката грчка партија Сириза во знак на поддршка на лицата кои штрајкуваат со глад поради условите во грчките затвори со максимум обезбедување.

Групата од педесетина анархисти влезе во зградата на Сириза во центарот на Атина и го принуди персоналот да го напушти објектот, соопштија партиски функционери.

Портпаролката на партијата Ранија Свигу изјави дека вработените не повикале полиција. Сириза претходно често ги критикуваше острите интервенции на полицијата кон протестите заради острите мерки за штедење.

Анархистите на терасите закачија транспаренти со кои повикуваат на укинување на контроверзните затвори од тип Ц, во кои се затворени најозлогласените грчки криминалци и терористи.

Активистите тврдат дека затворениците непотребно се изложени на остар режим во тие затвори и оти не им е дозволен контакт со семејствата. Тие, исто така, побараа и ослободување на Савас Ксирос, бомбаш од екстремната левичарска терористичка група „17 ноември“, кој е на отслужување доживотна робија, а кому сериозно му е нарушено здравјето.

Извор: Утрински Весник