Австриски министер: Воено-цивилна мисија во Македонија и Србија

Австрискиот министер за одбрана Ханс-Петер Доскоцил се залага за воено-цивилна мисија за заштита на границите на Македонија и Србија, како и за утврдување на терминали за регистрација на бегалците во овие земји, бидејќи Грција не е во можност да обезбеди надворешна граница на ЕУ.

Австрискиот министер за одбрана изјави во интервју за виенски весник дека не треба да се случи десетици илјади бегалци да бидат “заробени” во Србија и Македонија.

Според него, принципот на работа во овие земји треба да биде ист како и во Грција, и би се работело на подобро “совладување” на масата на луѓе кои доаѓаат.

Доскоцил објасни дека Балканскиот пат е ставен на дневен ред на последниот состанок на министрите за одбрана на ЕУ, со цел да се постигне договор што е можно поскоро.

“Во наредните недели предстои важен развој во Грција и Турција на прашањето за обезбедување на границите на ЕУ. Ако експертите дојдат до заклучок дека ние можеме да ги обезбедиме границите и дека ни треба хотспот во Србија и Македонија, тогаш тоа треба да се претвори во цивилно-воена мисија”, додаде Доскоцил.

Тој тврди дека од Македонија и Србија постојат сигнали дека овие земји се подготвени да го стори тоа.

Исто така, се проценува дека трошоците за учество на војската во мисии во странство, се далеку помалку од последиците.