Барањето за екстрадиција на Грујевски и Бошкоски ќе биде испратено деновиве

Барањето за екстрадиција на Горан Грујевски и Никола Бошкоски ќе биде официјално потпишано и испратено до грчките власти во следните денови, изјави министерот за правда Билен Саљији. Тој потврди дека пред два дена Кривичниот суд ја комплетирал потребната документација за екстрадиција и ја доставил до Министерството за правда на понатамошно постапување.

Екс разузнавачите Грујевски и Бошкоски се во екстрадициски притвор во Солун повеќе од две недели, откако на 18 октомври беа уапсени на аеродром во Солун со лажни бугарски пасоши. Тие беа два пати изведени пред судот во Солун , но судењето се одложи бидејќи не бил обезбеден преведувач од грчки на македонски јазик. Следното е закажано за 1 декември.

Грујевски и Бошкоски се обвинети од СЈО во предметите „Таргет“ и “Тврдина“ за незаконкото прислушување и уништување на опремата за следење на комуникациите.

Извор: Макфакс