Египетскиот суд ја отфрли жалбата на поранешниот претседател, Хосни Мубарак

Египетскиот суд во саботата ја отфрли жалбата на поранешниот египетски претседател Хосни Мубарак и неговите двајца синови во врска со обвинението и казната за корупција.

Тројцата веќе ја издржаа казната, сепак може да се случи тие да бидат затворени повторно. Од осудените се бара да платат парична казна од 125 милиони египетски фунти (15.960.000 долари), и да вратат 21 милион фунти на државната каса за да ги отплатат јавните средства кои тие ги пренасочиле за лична употреба во текот на владеењето на Мубарак.

Лицата беа осудени во мај на три години затвор без можност за помилување, иако тројцата веќе одлежаа најмалку три години во затвор, како резултат на други обвиненија.