Екстерно тестирање: Платите на наставниците ќе се намалуваат или зголемуваат за 15 отсто

Со Законот за изменување и дополнување на Законот за средното образование, кој е во фаза на подготовка и кој наскоро ќе се најде пред пратениците се врши изменување согласно договорените одредби од Спогодбата помеѓу Министерството за образование и наука и СОНК .

Се врши изменување и дополнување на членот 70-a од Законот за средното образование, во кој се регулира наградувањето на наставниците во средните училишта и нивниот кариерен напредок според резултатите од екстерната проверка на знаењата на учениците, како и изменување и дополнување на членовите 104, 109, 109-а, 109-г и членот 110, во кои износите на утврдените глоби значително се намалуваат.

Во иднина се предвидува врз основа на објавениот извештај со резултати од спроведеното екстерно проверување на постигањата на успехот на учениците, 20% од наставниците кај кои има најмали отстапувања во добиените показатели им се зголемува платата за наредната година за 15% од платата што ја примале.

Врз основа на објавениот извештај со резултати од спроведеното екстерно проверување на постигањата на успехот на учениците, 20% од наставниците кај кои има најголеми отстапувања во добиените показатели им се намалува платата за наредната година за 15% од платата што ја примале.

Зголемувањето, односно намалувањето на платите на наставниците согласно објавениот извештај со резултати од спроведеното екстерно проверување на постигањата на успехот на учениците за учебната 2013/2014 година, нема да се применува.

Извор: еМагазин