ЕП го поддржа предлогот за раселување на 120.000 мигранти

Европскиот Парламент денеска вонредно заседаваше во Брисел за да сe изјасни за предлогот на Европската комисија за раселување на 120.000 мигранти.

Предлогот беше поддржан со 372 гласа „за“, 134 беа против, а 52 европратеници беа воздржани.

Денешното гласање на европратениците има процедурален карактер и е неопходно пред новата вонредна средба на Советот на ЕУ за правосудство и внатрешни работи.

Откако ја доби „визата“ на европратениците, планот за раселување на ЕК може да влезе во сила, доколку биде поддржан и од Советот на ЕУ.

Според процедурата, Советот на ЕУ ги прифаќа квотите предложени од ЕК доколку за планот гласаат 16 од 28-те членки. Комисијата повеќепати појаснуваше дека има за цел постигнување едногласност, како и дека е подготвена да отстапи од своето инсистирање квотите да бидат задолжителни.

Извор: 24Вести