ЕП прифати петиција за поддршка на македонското малцинство во Бугарија | Правдико

Правдико

   

ЕП прифати петиција за поддршка на македонското малцинство во Бугарија

© Copyright 2020 pravdiko.mk Сите права се задржани. Не е дозволено преземање на оваа содржина или на делови од неа без претходна согласност од редакцијата на ПРАВДИКО.

Комитетот за петиции на Европскиот парламент ја прифатил петиција на бугарскиот новинар Михаил Михајлов за поддршка на македонското малцинство во Бугарија. Михајлов петицијата ја доставил на 12 декември минатата година.

„Со задоволство ве известувам дека Комитетот за петиции ја разгледа вашата петиција и ја прогласи за прифатлива. Врз основа на тоа, ја замолив Европската комисија да спроведе прелиминарна истрага за ова прашање. Бидете сигурни, дека ќе ве информирам за какво било понатамошно дејствие преземено врз основа на вашата петиција, вклучувајќи ги и резултатите на прелиминарната истрага на Европската комисија“, се наведува во одговорот на членката на Комитетот за петиции на Европскиот парламент, Долорес Монтсерат упатена до Михајлов.

Михајлов изрази надеж дека тоа ќе им даде дополнителен поттик на политичките партии во Бугарија „да ги почитуваат човековите права и правото на национално самоопределување, како и да дадат „зелено светло“ за членство на Северна Македонија во ЕУ.

„Бојко Борисов повеќе не е премиер и сега новите власти ќе треба да му објаснат на Европскиот парламент зошто Бугарија не го почитува Европскиот суд за човекови права и не го признава македонското малцинство, зошто во Бугарија масовно се кршат човековите права и зошто Бугарија одби да дозволи Северна Македонија да преговара за членство во Европската унија. Верувам дека на овој начин новите власти ќе бидат принудени да направат промени“, додава Михајлов во изјавата.

Извор: Радио слободна Европа

Препорачуваме

Партнери на Правдико