ЕУ загрижена поради апсењата на курдските пратеници во Турција

Европската Унија е длабоко загрижена поради апсењето лидери и пратеници на прокурдската Народна демократска партија (НДП) во Турција и по тој повод контактирала со Анкара, изјави високата претставничка за надворешна политика и за безбедност на ЕУ, Федерика Могерини.

Могерини на „Твитер“ објави дека Унијата контактирала со турските власти и оти е повикан на состанок амбасадорот на ЕУ во Анкара.

Странските агенции наведуваат дека засега никој од претставниците на ЕУ не можеле да изнесат детали за состанокот со амбасадорот.

Истовремено, турскиот министер за правда, Бакир Боздаг, рече дека апсењата на курдските пратеници се во согласност со законот.

Неколку часа по апсењето одекна експлозијата во јужниот турски град Дијарбакир, во кој мнозинството од населението се Курди.

– Меѓу жртвите има цивили и полицајци, а има и многу ранети – рече Боздаг, без да даде прецизни цифри.

Извор: Мета