Харадинај останува во Франција?!

Поранешниот косовски премиер и лидер на Ослободителната војска на Косово (ОВК), Рамуш Харадинај, во четврток повторно ќе се соочи со судскиот совет на Апелацискиот совет во Колмар, по повод барањето на Србија за негова екстрадиција поради обвинувањата за воени злосторства над српското и другото неалбанско население.

Рочиштето е закажано за 14 часот, а судот овојпат ќе ги има сите потребни елементи за да донесе одлука. Но тоа не значи дека Харадинај веднаш ќе дознае каква судбина го чека, пишува белградски „Новости“.

Вообичаено е дека кај вакви важни предмети одлуката се остава на советот, што би можело да потрае и неколку недели, но теоретски не е исклучено и ставот на судот да биде соопштен веднаш.

Доколку одлуката се донесе преку советување, што е најверојатно, конечната одлука би можела да биде соопштена на ново рочиште, најрано во четврток на 20-ти април. Во Апелацискиот суд во Колмар во средата се добиени побараните документи од српските влада, така што во четврток ќе се води расправа помеѓу обвинителството и адвокатите на Харадинај, каде секој ќе ги изнесе своите завршни аргументи. Судот може да одлучи Харадинај евентуално да биде ослободен или пак да го испорача на властите во Белград, а потоа конечниот збор да го има француската влада.

Извор: Макфакс