K-15 не исплатиле ни половина од фирмите

Помалку од два месеца имаат работодавците да им исплатат регрес за годишен одмор или популарно наречен K-15 на работниците.

Досега ниту половината од приватните фирми во земјава не го исплатиле овој додаток. Според процените и информациите на Сојузот на синдикати на Македонија, а само 40 до 45 отсто од фирмите исплатиле регрес, а другите чекаат пет до 12 за да ја исполнат обврската. Синдикалците се децидни дека со сите методи ќе се борат сите работодавачи да го испочитуваат овој надоместок за работниците.

– Ова прашање го сметаме за клучно и ова работничко право мора да се исполни. Kрајниот рок е 31 декември годинава, а после тоа ќе ги преземеме сите мерки што ни се на располагање да ги заштитиме работничките права. Нашата анализа покажува дека 40-45 отсто од фирмите веќе имаат исплатено K-15, останува таа бројка од околу половина, која треба дополнително да се исплати до крајот на годината. Секој работник на кој не му е исплатено K-15 и кој ќе побара помош од ССМ, без разлика дали е или не наш член, ќе ја добие. Ние остануваме на тоа и бесплатно ги нудиме услугите за поведување судски спорови против работодавачите што нема да исплатат регрес за годишен одмор – изјави за „Дневник“ претседателот на ССМ, Живко Митревски.

Митревски е дециден дека работодавачите мора да го испочитуваат ова работничко право, бидејќи тоа е договарано со Организацијата на работодавачи, која се согласи и на минималниот износ што е утврден. Инаку над 300.000 работници вработени во приватни фирми до крајот на годинава треба да добијат минимум по околу 8,500 денари или 40 отсто од просечната плата во земјава.

Извор: Дневник