Каталонија ќе оди на референдум, на повидок криза во Шпанија

Каталонија денеска треба да усвои закон со кој ќе се постават темелите за распишување референдум за независност на 1 октомври, за што Мадрид жестоко се спротивставува.

Референдумот денеска и официјално ќе биде распишан, се дознава од извори блиски на регионалната влада.

Се очекува сепаратистичките партии што имаат мнозинство во регионалниот парламент да усвојат предлог-закон игнорирајќи ја одлуката на шпанскиот Уставен суд со која референдумот се прогласи за неуставен.

Предлог-законот за референдум за независнот ќе биде на дневен ред денеска на специјална седница без расправа, а потоа највисоките претставници на каталонската Влада брзо ќе го потпишат, што ќе биде вовед во голема криза во Шпанија.

Каталонија е најбогата шпанска покраина со 7,5 милиони жители, сопствен јазик и обичаи, а носи една петтина од шпанските приходи во економијата.

Извор:Нова Македонија