Ќе има силни заштитни механизми од нелегално прислушување

Владата ќе воведе силни заштитни механизми за да се спречи нелегално прислушување, најавил министерот за информатичко општество и администрација Дамјан Манчевски вчера на промоција на студијата „Кон подобра рамнотежа меѓу заштитата на приватноста и потребата од следење на комуникациите“.

Министерот Манчевски, како што стои во соопштението од МИОА, се осврна на проблемот со масовното прислушување спроведено од претходната власт и на заложбите на новата влада никогаш повеќе да не се повтори нарушување на приватноста на граѓаните на Република Македонија.

– Владата е свесна за огромната важност на соодветното нормирање на прашањата поврзани со следењето на комуникациите. И затоа ми претставува особено задоволство што и граѓанските организации вложуваат значителни напори за надминување на предизвиците и отворените прашања поврзани со следењето на комуникациите – истакнал министерот Манчевски.

Пренесувајќи ги заложбите за воведување силни заштитни механизми што ќе спречат нелегално прислушување, Манчевски најавил дека мерките во таа насока ќе бидат имплементирани како итен приоритет.

– Техничките способности за пресретнување на комуникациите ќе бидат под силна независна контрола, вклучувајќи и судска контрола – истакнал министерот Манчевски.

Извор: Нова Македонија