Масовна вакцинација се планира во повеќе градови

Министерот за здравство, Венко Филипче, за периодот што следува најави масовна вакцинација на повеќе локации во државата, онаква каква што во моментот се спроведува во „А1-арената Борис Трајковски“ и во здравствените домови што имаат кадрови капацитети за да го организираат овој процес. Со ова се планира значително да се интензивира процесот на имунизација во моментот кога ќе пристигнат поголемите количини вакцини во периодот што следува.

„Во овој период што е пред нас ќе работиме очекувајќи ги кинеските вакцини, кои ќе направат најголема промена во динамиката на спроведување на вакцинацијата. Места за масовна вакцинација во уште неколку градови по примерот на салата ‘Борис Трајковски’, а тоа ќе бидат градовите Куманово, Штип, Кавадарци, Битола, Охрид и Тетово, покривајќи соодветни региони околу овие здравствени домови, кои може овој процес да го организираат со кадар“, рече Филипче.

Во однос на вакцинацијата во „А1-арената Борис Трајковски“, од утре се очекува да продолжи процесот на имунизација со трите типа вакцини – „астра зенека“, „спутник В“ и кинеските од производителот „Синофарм“ со вакцинација на граѓани на возраст од 73 и 74 години. Пријавени се приближно 5.000 граѓани, кои ќе бидат вакцинирани, а како стигнуваат следните количини вакцини, така ќе се надоврзат на процесот на вакцинација соодветно на возрасната граница.

Што се однесува до динамиката на испорака на вакцините, Филипче нагласи дека на 19 и на 26 април од компанијата „Фајзер“ има најава дека ќе испорачаат по 10.000 вакцини, кои Владата ги купила преку директни прегвори со производителот.

„Набргу, по завршување со административниот дел во Кина, се очекува да добиеме и податок за точниот датум кога ќе бидат испорачани овие дози од 200.000 вакцини. Јас имав средба со кинескиот амбасадор, очекувам да преземе обврска да направи што може, вчера имаше некое поместување, добив информации дека тој административен дел таму во Кина се забрзал. Очекуваме информација и од руската амбасада за дополнителни количини од вакцината ‘спутник В’. Повторно би требало 76.000 дози од ‘Астра зенека’ да стигнат до крајот на месецот за што утрово разговарав со претставничката на СЗО. Она што значеше помош преку трилатералните договори од ЕУ, што ги најавија за април, очигледно ќе се поместат според последните најави од утрово, а тоа е дека ќе пристигнат во првата недела од мај. Тоа се засега информациите како ќе пристигнуваат вакцините, од кои најголема количина наеднаш очекуваме да стигне од Кина. 200.000 вакцини ќе бидат распределени по овој систем на вакцинација, кој веќе се спроведува во државата“, изјави министерот на денешната прес-конференција за медиумите.

Извор: Макфакс