Народен правобранител: Нечовечки услови во затворите во Скопје, Струмица и во Гевгелија | Правдико

Правдико

   

Народен правобранител: Нечовечки услови во затворите во Скопје, Струмица и во Гевгелија

© Copyright 2022 pravdiko.mk Сите права се задржани. Не е дозволено преземање на оваа содржина или на делови од неа без претходна согласност од редакцијата на ПРАВДИКО.

По ненајавените посети на Народниот правобранител, на затворите во Скопје, Струмица и Куманово, констатирани се крајно лоши услови за сместување на притворените и осудените лица, сериозен недостаток на професионален и стручен кадар, што влијае на остварувањето на правата на притворените лица во процесот на ресоцијализација.

„Станува збор за нечовечки услови, затворениците одат во тоалет без врата, хигиената е на најниско ниво и на притворените им е ускратено правото на непречена здравствена заштита и остварувањето на други права за време на издржувањето на мерката притвор или казната затвор во казнено-поправните установи“, рече заменик народниот правобранител Васка Бајрамовска.

Според неа, затекнатите лоши материјални услови, несоодветната опременост на просториите за сместување, влагата и недоволното затоплување, нефункционалниот систем на повикување, се само дел од причините за кои Народниот правобранител препорача итно преземање мерки за санација на овие затвори.

Според Народниот правобранител од разговорот со притворените во затворите добиле информации исто така дека често се случува притворените лица да бидат навредувани на национална основа, особено припадниците на ромската заедница, како и грубо однесување на претресите од страна на службените лица, на понижувачки и дрзок начин.

Исто така замерка на Народниот правобранител е недостигот на медицински персонал во затворските установи поради што често изостанува преглед во првите 24 часа при прием на нови осудени, а на лицата сместeни во просториите за изолација не им се вршат секојдневни прегледи од страна на лекарот иако истото е законски задолжително.

„Медицинската заштита во затворите се одвива во услови на недостаток на здравствен и медицински кадар, а забележана е и неопременост на амбулантите со соодветна апаратура и лекови. Во затворите по 20 часот нема обезбедено присуство на здравствен персонал од било кој профил“, рече Бајрамовска, по што додаде дека особено незадоволителна е состојбата во затворот во Струмица, каде еден доктор од општа пракса и една медициска сестра од Здравствениот дом во Струмица доаѓаат само два пати во неделата по неколку часа.

Виктор Јованов

Извор: Макфакс

Препорачуваме

Партнери на Правдико