Од 15 ноември стапува на сила задолжителната обврска за носење зимска опрема! | Правдико

Правдико

   

Од 15 ноември стапува на сила задолжителната обврска за носење зимска опрема!

© Copyright 2020 pravdiko.mk Сите права се задржани. Не е дозволено преземање на оваа содржина или на делови од неа без претходна согласност од редакцијата на ПРАВДИКО.

Подгответе ги возилата за безбедно движење во зимски услови.

Прочитајте што сѐ е потребно за безбедно управување со вашето моторно возило во зимски услови.

zimska-oprema1

Зимата ни е пред прагот, па токму затоа и возачите треба да ги подготват своите возила за безбедно движење во зимски услови. Од 15 ноември, почнува да важи обврската за задолжително носење зимска опрема во возилата, која ќе трае сѐ до 15 март наредната година. Доколку не се почитуваат правилата за користење и носење зимска опрема во возилата, кои се предвидени во Законот за безбедност на патниот сообраќај, согласно истиот, на секој возач кој постапува спротивно на одредбите ќе му биде издаден платен налог со глоба во износ од 45 евра во денарска противредност, односно ќе му се регистрираат 25 негативни бодови.

Што треба да знаете за зимската опрема и што се подразбира под потребна зимска опрема?

Под зимска  опрема  за моторни  возила со најголема дозволена маса која не надминува 3.500 kg, се подразбира:

– зимски пневматици на сите тркала со минимална длабочина на шарите на слојот што гази, по обем и широчина од четири милиметри (4 mm);

– пневматици со летен профил на сите тркала со длабочина на шарите на слојот што гази, по обем и широчина, со минимум од четири милиметри (4 mm) и синџири за снег со адекватна големина  за погонските  тркала или други соодветни помагала.

11112014111409_zimska_oprema_0Зимска опрема за моторни возила со погон на четири тркала (4 х 4), подразбира:

– зимски пневматици на сите тркала со минимална длабочина на шарите на слојот што гази, по обем и широчина од шест милиметри (6 mm);

– пневматици со летен профил на сите тркала со длабочина на шарите на слојот што гази, по обем и широчина од најмалку четири милиметри (4 mm).  Синџири за снег потребно е да поседува секое возило со пневматици со летен профил, и притоа, во случај кога возилото е во постојан погон, синџири за снег треба да има најмалку за задната осовина, а во случај на преклоплив погон, синџири за снег треба да има најмалку на постојано вклучената осовина.

Зимска опрема за моторни возила со најголема дозволена маса која надминува 3.500 kg, подразбира:

– зимски пневматици на погонските тркала со минимална длабочината на  шарите на слојот што гази, по обем и широчина од шест милиметри (6mm);

– пневматици со летен профил на сите тркала со длабочина на шарите на слојот што гази, по  обем и широчина, со минимум од четири милиметри (4mm) и синџири за снег со адекватна големина  за  погонските  тркала или други  соодветни помагала;

– автобуси и товарни моторни возила кои поради технички причини не можат да постават  синџири за снег на погонските тркала, треба да имаат зимски пневматици на погонските тркала, и:

– прирачен алат – лопата.

Зимски пневматици се оние пневматици кои на својата бочна страна имаат ознака:

„MS“, „M+S“, „M&S“ и знак на снегулка на стилизирана планина со три врва.

Во патниот сообраќај, на возилата не се поставуваат пневматици со клинци.

Полициски службеник ќе нареди на возач да го прекине натамошното движење на возилото, ако не постапи според сообраќајниот знак за задолжително носење и употреба на зимска опрема. Исто така, полициски службеник може да нареди на возач да го прекине натамошното движење и тогаш кога не постои сообраќаен знак за задолжително носење на зимска опрема, ако зимските услови на патот не овозможуваат непречено и безбедно одвивање на сообраќајот, односно полицискиот службеник може да му нареди на возач задолжително да ја постави на возилото зимската опрема.

Републичкиот совет за безбедност на сообраќајот на патиштата, апелира – возачи, носете ја и користете ја зимската опрема за своите возила, само на тој начин, пред сѐ, самите ќе си овозможите услови за безбедно управување со своето возило и безбедно и непречено ќе пристигнете на саканата дестинација!

Извор: РСБСП

Препорачуваме

Партнери на Правдико