Планот на Путин за Сирија

Се множат информациите за засилено руско воено присуство во Сирија, но засега нема цврст доказ за такво нешто. Руските аналитичари се сомневаат дека Русија може воено да ја победи ИД.

Тоа не беше непоколеблив демант: „Немам информација за тоа“, одговори портпаролот на рускиот претседател Владимир Путин во понеделникот во Москва на прашањето на еден новинар за тоа дали Русија ја проширила својата воена помош за Сирија. Самиот Путин три дена претходно изјави дека Москва размислува за разни можности. Военото учество на Русија во борбата против терористичката милиција „Исламска држава“ не е на дневен ред, рече Путин.

Од почетокот на септември се шират информациите дека Русија наводно распоредила свои трупи во Сирија за да се борат на страната на сириската армија против ИД. Некои извори се повикуваат на социјалните мрежи каде, наводно, виделе фотографии од руски војници во Сирија. Во други извештаи се говори дека Русија во Сирија испратила најнова воена технологија со воени бродови и дека сака да изгради база за противвоздушна одбрана.

Засилено снабдување со оружје

Цврсти докази за тоа досега не се презентирани во јавноста. Потрагата по такви докази се чини е тешко, затоа што Русија веќе со децении има свои трупи во Сирија. „Сосема е нормално што во Сирија има руска војска“, вели за ДВ, Алексеј Малашенко, експерт за Блиски исток во московскиот Карнеги центар. „Војската е таму присутна од 1955 година и има различни задачи бидејќи сириската армија е целосно вооружена со руско оружје“.

Москва и Дамаск се стари сојузници. Во сирискиот крајбрежен град Тартус на Средоземното море, Русија има морнаричка база. Од почетокот на граѓанската војна во Сирија во 2011 година, Русија својата политичка поддршка постојано ја надополнува и со испорака на оружје. Москва сега тоа го образложува со борбата против ИД.

САД, во секој случај, минатиот викенд сметаа дека е неопходно да ја предупредат Русија од евентуален воен напад во Сирија. Државниот секретар Џон Кери во телефонски разговор со рускиот колега Сергеј Лавров ја искажал загриженоста на Вашингтон и предупредил дека проширувањето на руската воена помош за сирискиот претседател Башар ал Асад само дополнително ќе ја заостри состојбата.

Експертите предупредуваат од грешки

Руските воени експерти како Александар Голц се сомневаат дека Русија веќе воено делува во Сирија. „Не постојат темелни докази“, вели Голц, но не ја исклучува таа можност во иднина. „Доколку се земе предвид дека во Русија еден човек одлучува за сѐ, се е можно“, вели Голц. Тој смета дека руската воена акција во Сирија би имала смисол само доколку тоа радикално би го променило текот на војната. „Јас не верувам дека Русија денес може да испрати толку многу трупи што ќе и‘ овозможат воена победа против ИД во Сирија и Ирак“, вели Голц.

Доколку тоа се случи, тогаш Русија би ги игнорирала како меѓународните, така и сопствените советски искуства од Авганистан во 80-те години. И аналитичарот Алексеј Малашенко смета дека можната руска воена интервенција во Сирија би била „голема грешка“. Таа би имала мали изгледи за успех, а ни руското општество не би ја поддржало, вели Малашенко.

Во Москва ретко кој верува дека сирискиот претседател би можел да се одржи на власт без поддршката на Русија. Григориј Мирскиј од руската Академија на науки ја смета Сирија за „безнадежен случај“. Но тој верува дека Путин ќе стори сѐ, за да не дозволи пад на Асад.

Извор: DW