Пленумци со крст пред собрание го погребаа високото образование

По изгласување на изменетиот и дополнет Закон за високо образование, Студентскиот и Професорскиот пленум вечерва импровизираа погреб на високо образование пред Собранието. Пленумците палеа свеќи и држеа некролози во рацете. Тие поставија и крст пред законодавниот дом.

Собранието на Република Македонија попладнево на 31-вата седница го донесе Законот за изменување и дополнување на Законот за високото образование, кој е дел од пакетот седум образовни закони, сите донесени на денешната седница.

За државниот испит ќе има пробна година, што вчера беше побарано од Ректорската управа на УКИМ. Министерот за образование и наука Абдилаќим Адеми го прифати амандманот со кој се дополни предлог-законот – државниот испит што ќе го полагаат студентите, првата година да се спроведе како пилот-проект.

Извор: Утрински Весник

Фото: Киро Попов