Почнува јавна кампања за прогласување на Шар Планина за национален парк

Центарот за едукација и развој (ЦЕД) во соработка со Министерството за животна средина и просторно планирање (МЖСПП) и Програмата за животна средина на ОН (УНЕП) почнуваат со имплементација на јавната кампања за прогласување на Шар Планина за национален парк.

Кампањата на терен ќе се спроведува со директно вклучување, информирање и консултирање на локалното население, приватните бизниси и сите засегнати страни што гравитираат на подрачјето на идниот национален парк, со цел да бидат добро информирани и запознаени што претставува национален парк, кои се придобивките, вклучувајќи ги и социо-економските аспекти и зошто Шар Планина треба што побргу да се заштити со закон. Кон кампањата се приклучуваат и организациите од платформата „Пријатели на Шара“ преку конкретни активности на терен и медиумска промоција, а добредојдени се да се вклучат со свои активности и сите други организации, кои ја изразија својата желба да го помогнат процесот со потпишувањето на меморандумот за соработка.

За детаљно информирање на населението во рамките на проектот, во согласност со Планот за комуникација, предвидени се низа активности и изработени разни промотивни материјали.
Кампањата ќе почне со „Патувачко кино“ во руралните средини на идниот национален парк со проекција на промотивното видео и дискусија со локалното население, а ќе продолжи со организирање тематски форуми со засегнатите страни на разни теми, како што се ловството, туризмот, руралните активности и др.

За подобро разбирање на процесот, ќе биде спроведена и јавна презентација на студијата за валоризација на Шар Планина, а ќе се обезбеди и поголема застапеност на темата во медиумите преку гостувања и интервјуа со експерти од разни области, редовни брифинзи на новинари за процесот, како и објавување колумни на експерти и поддржувачи.

За подобра презентација на Шар Планина и на нејзините убавини за кои се слуша надалеку, ќе бидат организирани прошетки низ природните убавини на Шар Планина, ќе се изработат и фотоприказни од успешни локални претприемачи и тие ќе бидат споделени во социјалните медиуми.
Со цел да се обезбеди висок степен на транспарентност на процесот, на веб-страниците на МЖСПП се отворени посебни потстраници, каде што се објавени документите поврзани со процесот и се достапни на следниот ЛИНК.

Јавната кампања за прогласување на Шар Планина за национален парк се спроведува во рамките на проектот: „Постигнувањето на заштита на биолошката разновидност преку создавање и ефикасно управување со заштитени подрачја и интегрирање на биолошката разновидност во планирање користење на земјиштето“, финансиран од Глобалниот фонд за животна средина (ГЕФ), а имплементиран преку Програмата за животна средина на Обединетите нации (УНЕП), регионалната канцеларија во Виена и Министерството за животна средина и просторно планирање на Северна Македонија како главен партнер и корисник. Центарот за едукација и развој (ЦЕД) е локален партнер одговорен за спроведување на јавната кампања. Некои од активностите се поддржани и од Германското друштво за меѓународна соработка (ГИЗ), а во спроведувањето се вклучени и Македонско еколошко друштво (МЕД) и платформата „Пријатели на Шара“.

Извор: Макфакс