Предложен закон за формирање слободни здравствени зони

Формирањето на слободни здравствени зони со кој ќе се обезбедат поволни услови за привлекување странски инвестиции во областа на здравството и привлекување најсовремена здравствена технологија, како и поттикнување на здравствениот туризам, е проект на Владата на Република Македонија кој треба да биде имплементиран во претстојниот период, со крајна цел првата слободна здравствена зона да биде отворена во 2017 година.

Во овој контекст и во насока на создавање на правни претпоставки за отворање и работење на слободните здравствени зони изготвен е предлог закон за слободните здравствени зони. Со Предлог – законот за слободните здравствени зони се уредуваат погодностите за инвестирање во слободните здравствени зони, условите, начинот и постапката за основањето, развојот и работењето на слободните здравствени зони, дејностите кои се вршат во слободните здравствени зони и посебните услови за нивно вршење, примената на царинските прописи во слободните здравствени зони, како и престанокот на работа на слободните здравствени зони и на корисникот на слободните здравствени зони.

Целта на овој Предлог-закон е развој на здравствениот туризам, подигнување на нивото на здравствената заштита во Република Македонија со привлекување на странски капитал за воведување на нови здравствени методи и постапки, трансфер на know how и технологија и зголемување на конкурентноста и на вработувањето, зголемување на квалитетот на високообразовната понуда од областа на медицината, воспоставување и промовирање на вредности и практики и понуда на повисок квалитет на образование од постојниот, кој ќе донесе современи и квалитетни образовни методи.

Предлог – законот за слободните здравствени зони повлекува обврска за обезбедување средства за негово спроведување од Буџетот на Република Македонија. Предвиден е буџет во висина од 30.000.000 денари потребни за уредување на зоната од страна на основачот, обезбедување средства за државна помош за корисниците на зоните и нејзино промовирање заради привлекување на странски и домашни инвеститори. Се планира првата слободна здравствена зона да биде отворена во текот на 2017 година.

До отворањето на првата слободна здравствена зона се планира изготвување и печатење на брошура за слободни здравствени зони веднаш по донесувањето на законот за слободните здравствени зони; наоѓање на на прифатлива локација и соодветно земјиште за основање на слободна здравствена зона; изготвување на план за промоција на слободните здравствени зони; уредување на слободната здравствена зона пред нејзиното основање и отворање во текот на 2015 и 2016 година и отворање на првата слободна здравствена зона во текот на 2017 година. Потребно е и обезбедување на средства за државна помош за корисниците на зоните со Буџетот на Република Македонија за секоја година, почнувајќи од 2017 година.

Предлог законот можете да го превземете ТУКА