Претреси во неколку куќи за трикратното убиство во Дебар

Oд Основното јавно обвинителство Гостивар информираат дека завршен е увидот на местото на тројното убиство во Дебар, каде што, според првичните сознанија, било извршено убиство на тричлено семејство – маж, жена и нивната 14-годишна ќерка.

„По наредба на јавен обвинител беа земени парафински ракавици и беше извршен претрес во домовите на неколку лица со кои жртвите во последниот период поинтензивно контактирале, но сè уште нема осомничен извршител на кривичното дело“, се наведува во соопштението.

Јавниот обвинител издал наредба и за обдукција на починатите лица, како и наредба за вештачење на сите траги и материјални докази пронајдени на самото место.

Дополнително, детаљно ќе бидат сослушани сите лица што ги познавале жртвите и кои би можеле да помогнат за расветлување на случајот.

Извор: Макфакс