Пронајдена дрога кај двајца браќа од Граешница

Поради поседување на дрога изречена е мерка притвор за двајца браќа од село Граешница, информираат од Основното јавно обвинителство Битола.

При извршениот претрес во домовите на двајцата осомничени, на возраст од 33 и 29 години, била пронајдена дрога, известуваат од обвинителството.

Осомничените, од засега непознати лица, неовластено ја набавиле дрогата со намера да ја продадат. Кај едниот од нив, марихуаната во вкупна нето-маса од 1843,6 грама била пронајдена во помошна просторија која е во состав на неговото дворно место.

При претресот биле пронајдени и 566 семки со нето-маса од 6,92 грама.

Во помошна просторија која се наоѓа во дворното место на вториот осомничен службените лица при вршење на претресот пронашле гранки, листови и врхушки од растението канабис сатива, од кое со понатамошна преработка може да се добијат опојни дроги, велат од обвинителството.

Од таму додаваат дека мерката притвор во траење од 30 дена е изречена поради непречено одвивање на кривичната постапка.

Извор: Макфакс