Пусиќ: Ќе се кандидирам за генерален секретар на ОН

Хрватската министерка за надворешни работи Весна Пусиќ ги потврди гласините за тоа дека планира да се кандидира за генерален секретар на Обединетите нации.

– Станува збор за неформална одлука на Советот за безбедност од кој дел на светот ќе биде следниот генерален секретар. Се уште не е дефинитивно одлучено дека тоа ќе биде Источна Европа, на која и ние припаѓаме, но засега изгледа дека така ќе биде. Колку што знам, ниту Руската Федерација не се противи на тоа кандидатот да биде од Источна Европа, а и тие припаѓаат на тоа подрачје, вели Пусиќ.

– Кога станува збор за мене, поттикот дојде од Европа, и тоа би било првпат во историјата Хрватска да има кандидат за првото место во ОН. Тоа би било фантастично, бидејќи и самата кандидатура е големо признание за Хрватска и воопшто за нашата видливост во меѓународните односи, порача хрватската министерка.

Одлуката би се донела на есен во 2016 година. Предлогот многу е поврзан со Советот за безбедност, кој има пет постојани членки, па првиот чекор е никој да не стави вето на нечија кандидатура. Потоа, Советот за безбедност предлага кандидат до Генералното собрание, по што следува гласање. Новиот генерален секретар ќе стапи на должност на 1 јануари 2017 година.

Извор: Нова Македонија