Се водат истраги за потенцијални измами со пари од ЕУ-фондовите

Македонските институции со помош од ЕУ ја зајакнуваат контролата врз трошењето на европските пари и изработија национална стратегија за заштита на финансиските интереси на ЕУ во Македонија за периодот 2017-2020 година.

Во Македонија веќе се водат неколку истраги за потенцијални измами со средства од ЕУ-фондови, соопшти Александар Тргачевски на вчерашната презентација на проектот „Понатамошна соработка за ефикасна превенција и сузбивање на измамите и неправилностите со фондовите на ЕУ“ што го спроведуваат институции од Литванија и Македонија, во изминатите осум месеци, со поддршка од ЕУ.

Двете страни соработуваа во извршување процена на законската и институционална рамка на системот за борба против неправилности и измами со европски фондови и како тој функционира, изработка на прирачници, организирање работилници за детекција на измами и неправилности и спроведување обуки за обвинители во делот за детекција и водење истраги за измами со ЕУ-фондови.

Тргачевски, кој е проект-лидер за Македонија, истакна дека во рамките на проектот е изработен и стратегиски документ национална стратегија за заштита на финансиските интереси на ЕУ во Македонија за периодот 2017-2020 година.

Претставникот на делегацијата на ЕУ, Мартин Клауке, рече дека борбата против измами и корупција е клучен елемент во подготовката на земјата за пристап кон ЕУ, во однос на ефикасно управување со финансиите, отчетност, транспарентност и интегритет и дека поради тоа е важно посочените измени да се усвојат во законодавството за подобрување на системот против измами и неправилности.

Клауке, во однос на ИПА-фондовите за Македонија, потсети дека Европската комисија неодамна ја објасни загриженоста за непланирањето во клучните сектори и немањето политичка определба за секторски реформи и по општите определби, поради што донесе одлука за намалување на финансиската поддршка, како и да не продолжи со проектот за Коридорот 8.

– Европскиот суд на ревизори пред две недели упати на потребата да се покаже политичка волја во однос на реформите за да може поефикасна да биде европската помош и да се користат европските фондови. Стопирањата се во програмскиот дел поради немањето реформи и недоволна подготвеност и капацитет во одредени сектори – посочи Клауке.

Државниот секретар во Министерството за финансии, Игор Димитров, истакна дека преку проектот Управата за финансиска полиција добила одлична можност за соработка и помош од Министерството за финансии на Литванија.Тој посочи дека во рамките на проектот се извршени процена и анализа на законската рамка во областа на превенции и борба против измами и неправилности со ЕУ-фондови и дека за Македонија е од големо значење воведувањето на европските практики во сите сфери, особено во финансиите и затоа учењето и споделувањето искуства со твининг-партнерите се непроценливи.

Носител на проектот од Македонија е Управата за финансиска полиција при Министерството за финансии, а партнери од Литванија се Министерството за финансии, Централната агенција за спроведување проекти, Управата за водење финансиски истраги, Државното обвинителство на Литванија и Специјалната служба за водење истраги.

Извор: Нова Македонија