Секторот за компјутерски криминал и натаму го истражува хакерскиот напад на страницата на ДИК

Секторот за компјутерски криминал при МВР до скопското Основно јавно обвинителство доставил известување со образложение за сите мерки и активности преземени во насока на расчистување на хакерскиот напад врз интернет- страницата на Државната изборна комисија (ДИК) на денот на предвремените парламентарни избори.

„Станува збор за DDoS-напад, кој бил насочен кон страницата https://www.sec.mk/, а кој влијаел на оневозможување на објавувањето на прелиминарните резултати од изборите“, објаснуваат од МВР.

Од таму додаваат дека Секторот за компјутерски криминал и дигитална форензика во соработка со Јавното обвинителство за овој случај ги користи сите механизми за меѓународна соработка со интернет-сервис провајдери кои се надвор од домашна јурисдикција, со цел добивање податоци за корисниците на нивните сервиси.

„Истрагата за овој случај продолжува во насока на утврдување на ИП-адресите од каде што е пристигнат нападот, собирање дополнителни информации за утврдување на нарачателот на овој напад, како и утврдување дали имало други причини кои влијаеле или се поврзани со неможноста на објавувањето на прелиминарните резултати“, се наведува во соопштението.

Извор: Макфакс