Сменет шефот на мисијата на ОН во Централноафриканската Република

Првиот човек на мисијата на ОН во Централноафриканската Република (ЦАР), Бабакар Гаје, денеска е сменет од должноста по серијата обвиненија за сексуални напади на „сините шлемови“ врз деца, изјави генералниот секретар на ОН, Бан Ки-мун, цитиран од француските медиуми.

– На мое барање 64-годишниот Гаје ми ја врачи оставката. Не можам со збориви да ги изразам мојот гнев, болка и срам, кои ги преживувам од овие повторени обвиненија за сексуална експлоатација и силувања, вршени од силите на ОН. Нема да дозволам никакви махинации од страна на оние кои довербата ја менуваат со страв. До тука е. Доволно е!- изјави Бан Ки Мун.

Веста за оставката доаѓа еден ден откако почна истрагата по обвиненијата за силување девојчиња и за убиството на 16-годишно девојче и нејзиниот татко, извршени од „сините шлемови“ во вооружена операција во главниот град на ЦАР, на почетокот на август. Во оваа акција за фаќање на поранешниот лидер на поранешната бунтовничка коалиција Селека во Банги беа убиени најмалку пет лица, вклучувајќи и еден војник на силите на ОН.

Сегашната истрага почна по мноштвото слични случаи, поврзани со „сините шлемови“ кои доаѓаат од Мароко и Бурунди.

Извор: Нова Македонија