Судот го одби барањето за изземање на Лаличиќ, која му суди на напаѓачот на Тодоров

Судот го одби барањето за изземање на судијката Сафије Лаличиќ, која му суди на Љупчо Стојановски, дедото на малата Тамара, кој е обвинет за обид за убиство на ексминистерот за здравство, Никола Тодоров.

Претходно, неговата адвокатка побара изземање на Лаличиќ. Таа достави транскрипт од разговорот со ексминистерот на УБК, Сашо Мијалков, кој бил член на Извршниот комитет на ВМРО-ДПМНЕ во време кога во ова партиско тело членувал и оштетениот Никола Тодоров.

Стојановски е дедо на починатата Тамара од Велес, кој на 1 јуни годинава пукаше во поранешниот министер за здравство, Никола Тодоров. Тој се товари за две кривични дела – обид за убиство и недозволено изработување, држење и тргување со оружје или распрскувачки материи. Судот му определи притвор на Стојановски поради постоење опасност од бегство и опасност од извршување на истото кривично дело.

Инцидентот се случи на 1 јуни годинава пред Министерството за здравство. Според она што го кажал пред полицијата, тој дошол утрината сам во Скопје. Кај себе имал повратен билет за Велес. Кажал дека напрвин го чекал Тодоров дома, но ексминистерот не се појавил. Потоа дошол пред Министерството за здравство и веднаш кога му се појавил пред очите, почнал да пука кон него. За среќа, Тодоров не беше повреден.

Набргу по инцидентот, мајката на починатото болно девојче од Велес рече дека револтот во семејството е голем, но дека никогаш не помислила дека татко ѝ ќе посегне по животот на ексминистерот Тодоров од кого семејството и јавноста бараа одговорност за смртта на Тамара. Таа почина чекајќи Фондот да ѝ одобри средства за операција во странство.

В. М.

Извор: Макфакс