Судот одлучи: Заев ќе треба да му плати 50.000 евра на Груевски

Лидерот на СДСМ Зоран Заев треба да плати 50 илјади евра за повреда на личните права, угледот и честа на премиерот Никола Груевски, одлучи денеска Основниот суд Скопје 2. Судскиот совет со кој претседаваше судијката Весна Калковска во целост го прифати тужбеното барање на премиерот Никола Груевски.

Во краткото образложение судот прифатил дека Заев со одржаните прес-конференции на кои говорел за криминална продажба на Македонска банка го наклеветил премиерот, односно го нарушил неговиот углед и чест со тврдењата дека примил поткуп.  

Одлуката беше донесена откако во 12 часот беа дадени завршните зборови за процесот кој траеше неколку рочишта. Премиерот Никола Груевски го тужеше лидерот на СДСМ Зоран Заев за клевета и навреда за случајот со продажбата на Македонска банка. Заев пред неколку месеци обвини дека премиерот Груевски лично ја продал Македонска банка, на српскиот бизнисмен Јовица Стефановиќ – Нини. Наводно, според тврдењата на СДСМ, при продажбата, премиерот добил 1,5 милиони евра во кеш.

За ваквото обвинување премиерот поднесе тужба против Заев, со која првично побаруваше оштета во висина од 500.000 евра. На вчерашното рочиште на кое сведочеа и Груевски и Заев, адвокатот на премиерот соопшти дека го намалуваат оштетното побарување на 50.000 евра.

Сведокот Нини, кој беше предложен од лидерот на СДСМ Зоран Заев, сведочеше во корист на премиерот Никола Груевски. Судот како доказ ја отфрли снимката на која наводно се договара продажбата на Македонска банка, а не беше прифатено ниту барањето да сведочи Ден Дончев. Лидерот на СДСМ вчера пред судот посочи дека документите за случајот ги добил токму од Дончев.

Адвокатите на Заев веднаш по објавувањето на пресудата најавија жалба.

Извор: Утрински весник