Тајландската полиција заплени дрога во вредност од 29 милиони долари

Тајландската полиција заплени дрога вредна 29 милиони долари и уапси 11 шверцери во серија акции минатата недела. Во осум одделни случаи на Тајланд запленети се 1,7 милион таблети метамфетамин, повеќе од 700 килограми кристален метамфетамин и околу 1,4 тони марихуана, соопшти тамошната полиција.

Меѓу уапсените двајца се Малезијци, а еден од танзаниска националност. Другите осомничени се со тајландска националност. Шверцерите на дрога во Тајланд може да добијат и смртна казна. Тајландскиот судски систем, сепак, предвидува поблаги санкции ако осомничениот се изјасни за виновен.

Оваа земја од Југоисточна Азија во 2009 година погуби една личност во случај поврзан со дрога.

Таблетите метамфетамин се многу популарна дрога на Тајланд и во Југоисточна Азија. Тајландската полиција соопшти дека во 2017 година биле запленети двапати повеќе метамфетамински таблети во споредба со претходната година.

Извор: Макфакс