Тепачка за државна работа: На огласите на Агенцијата за администрација доставени 109.000 пријави

До Агенцијата за администрација лани биле доставени и обработени вкупно 109.183 пријави за вработување по пат на јавен оглас или во просек 49,86 пријави за еден извршител.

Од овој број 107.751(98,69%) отпаѓа на пријави кои се доставени електронски, додека останатиот дел од 1.432 (1,31%) се доставени писмено до архивата на Агенцијата, пишува во извештајот за работата на Агенцијата за администрација во текот на 2014 година.

Во Агенцијата информираат дека лани објавиле вкупно 384 јавни огласи за 2.190 извршители за нови вработувања.

„За потребите на државните органи беа објавени 232 јавни огласи за вработување на 1.644 извршители, додека за во општините и градот Скопје беа објавени 152 јавен оглас за вработување на 546 извршители. Во текот на 2014 година, Агенцијата објави вкупно 77 интерни огласи за 166 извршители“, се вели во извештајот.

За потребите на државните органи биле објавени 17 интерни огласи за унапредување на 63 извршители, додека за во општините и градот Скопје беа објавени 60 интерни оглас за унапредување на 103 извршители.

Во 2014 година, до Агенцијата се доставени и обработени и вкупно 229 пријави за вработување по пат на интерен оглас или во просек 1,38 пријава за еден извршител.

Извор: еМагазин