Украина бара 20 милијарди евра за промена на курсот кон ЕУ

На украинското стопанство ќе му бидат неопходни 20 милијарди евра помош поради последиците од евентуалното потпишување на Договорот за асоцијација со ЕУ, вели премиерот Азаров.

„Предлагаме прашањето да се регулира со пружање на финансиска помош на Украина. Пресметавме дека се неопходни околу 20 милијарди евра“, изјави премиерот на Украина, Микола Азаров.

Според него, Киев предлага ЕУ да учествува во финансирање на проекти кои би биле корисни и за Украина и за ЕУ, како што е модернизацијата на „коридорот за транспорт“, алудирајќи при тоа на гасоводите кои минуваат низ Украина.

Киев на почетокот на ноември се откажа од потпишувањето на Договорот за асоцијација со ЕУ, оценувајќи дека Украина не може да си ги дозволи економските загуби кои би следувале поради евентуалното влошување на односите со Москва.

Поради таа одлука, во Киев веќе три недели се одржуваат протести, а опозицијата наведува дека властите и го свртеле „грбот“ на ЕУ и Украина ѝ ја предале на Русија.

„И владата е за брзо потпишување на договорот со ЕУ но сакаме да обезбедиме услови и во најголема можна мерка да ги намалиме загубите за нашата економија“, рече Азаров.

Тој соопшти дека со рускиот претседател Владимир Путин на 17 декември во Москва нема да разговара за влезот на Украина во Царинската унија на Русија, Белорусија и Казахстан, чија суштина е меѓусебната слободна трговија.

„Сакам да ги демантирам сите шпекулации, нема да има разговори за Царинска унија и Владата за тоа не подготвува никаков документ“, рече Азаров.

Извор: Deutsche Welle