Уставниот суд овозможи исплата на земјоделските субвенции

Уставниот суд на денешната седница донесе конечна одлука за укинување на оспорените одредби од Изборниот законик и од Законот за спречување на корупцијата, со што треба да се овозможи исплата на земјоделските субвенции. Одлуката на Судот ќе важи од денот на објавување во Службен весник на Република Македонија.

Минатата недела Уставниот суд поведе постапка за оценување на уставноста и донесе времена мерка за запирање од извршување на оспорените одредби со кои се забрануваше исплатата на земјоделските субвениции до формирањето на новата влада.

Иницијативата до Уставниот суд беше поднесена од земјоделското здружение „Агротиквешија“ со која се бараше оспорување на членот од Изборниот законик, според кој е забранета исплата на субвенции до формирање нова влада.

И покрај времената мерка, согласно деловникот на Уставниот суд, Министерството за финансии немаше законско право да ги исплаќа субвенциите до носење конечна одлука од страна на Судот.

По официјално објавување на конечната одлука на Уставниот суд, од Министерството велат дека ќе нема законски пречки и ќе пристапат на исплата на субвенциите.

Извор: Макфакс